Saturday, September 12, 2009

ချစ်သော သစ်ပင်

လူတွေ အများကြီးထဲကမှ ကျမတို့ ဆုံတွေ့ခဲ့ပါတယ် .. လုံးဝကို မထူးဆန်းပဲ အရိုးရှင်းဆုံးပါပဲ ..

သူငယ်ချင်းတွေကြားထဲကမှ သူနဲ့ ကျမ ပိုမိုရင်းနှီးခဲ့တာ ကံကောင်းခြင်းလား ကံဆိုးခြင်းလား .. ခုချိန်ထိတော့ ကံကောင်းခြင်းလို့ပဲ ယူဆထားပါတယ် .. ပျော်ရွှင်မှုဟာ ကျေနပ်စရာကောင်းတယ်ဆိုရင် ဒါဟာ ကံကောင်းမှုပါပဲ ..

ကျမဘ၀မှာ သိပ်ပြီး ဆန်းဆန်းပြားပြားတွေ မကြုံတွေ့ခဲ့သလိုပဲ ချစ်ခြင်းနဲ့ ပတ်သက်ပြီးလည်း မထူးဆန်းခဲ့ပါဘူး .. စစချင်း ခင်တယ် .. နောက်တော့ ပြောရင်းဆိုရင်း ဆက်ဆံမှုတွေ နွေးထွေးခဲ့တယ် .. နောက် သံယောဇဉ်တွေ သူများတွေထက်ပိုပြီး ချစ်သွားတယ် .. ဒီလောက် ရိုးရှင်းပါတယ် .. နောက်ထပ်လည်း ဆန်းပြားမယ့် ကိစ္စတွေသာ ရှိမလာခဲ့ရင် ရိုးရှင်းစွာနဲ့ ရှေ့ဆက်သွားဖြစ်ပါဦးမယ် ..

လူတိုင်းမှာ လိုအင်ဆန္ဒတွေ ရှိကြတယ် .. ကျမမှာလည်း သာမန် ဆန္ဒတွေ ရှိပါတယ် .. ဘ၀ကို ငြိမ်းငြိမ်းချမ်းချမ်း မပူပင်ပဲ ဖြတ်သန်းသွားချင်တယ် .. ကျမတို့ နှစ်ယောက်ရှိမယ့် ကမ္ဘာလေးမှာ စိတ်ဆိုး စိတ်ကောက်တာတွေရှိမယ် .. ငြိမ်းငြိမ်း ချမ်းချမ်း ကြင်နာနေချိန်တွေရှိမယ် .. ရှေးဟောင်းနှောင်းဖြစ်တွေ ပြောဖြစ်မယ့် အချိန်တွေရှိမယ် .. အငြင်းပွားမယ့် အချိန်တွေ ရှိမယ် .. ဘယ်လို အခြေအနေ ဘယ်လို အချိန်အခါမျိုးပဲ ဖြစ်နေပါစေ လိုအပ်နေချိန်မှာ ကျမ အတွက် သူရှိနေမယ် သူ့အတွက် ကျမ ရှိနေချင်တယ် .. လောဘမကြီးဘူး ထင်ပါတယ် .. ကျမ ပျော်ရွှင် ငြိမ်းချမ်းချင်မိပါတယ် ..

တခါတလေတော့လည်း သူ့ကို သနားမိတယ် .. ကျမက ကိုယ့်စိတ်နောက်ကိုတောင် ကိုယ် လိုက်မမှီသူလေ .. ဒီအတွက် ကျမစိတ်ကို နားလည်ဖို့များ သူကြိုးစားမိရင် မောနေရှာမှာပဲ .. မမောစေချင်မိပါဘူး .. ဒါပေမယ့် ပြင်မရတဲ့ အကျင့်ဆိုးလေးတွေကို သည်းခံပေးပါဦးနော် .. ပြင်ဖို့ ကြိုးစားနေပါတယ် ..

စိတ်ဆိုးလွယ်တဲ့ ကျမအတွက် ကိစ္စတိုင်းက ဆူလွယ်လွန်းတယ် .. ဒါပေမယ့် သူ့စကားတွေကြောင့် ကျမ ငြိမ်းချမ်းမှုတွေ ရတယ်ဆိုရင်ရော .. ချစ်တယ် ဆိုတဲ့ စကားအတွက် ကျေးဇူးတင်ပါတယ် ..း) တကယ် ရင်ထဲက စကားပါ ..

ဘယ်အရာမှ တရားသေ တွက်ခွင့်မရှိတဲ့ လူ့ဘ၀ကြီးမှာ ကျမတို့လည်း အခြေအနေပေါင်းစုံ ကြုံတွေ့နိုင်တယ်တဲ့ .. ဒီလိုတွေးလို့ ကျမ အဆိုးမြင်သူတယောက်လို့ စွပ်စွဲနေချင်သေးလား .. အဆိုးမြင်တယ်လို့တော့ မသုံးသတ်မိဘူး .. ဖြစ်နိုင်ခြေရှိတဲ့ အရာတွေကို ကြို စဉ်းစားမိတာပါ .. ဒါလည်း ကျမ အကျင့်တခုပါပဲ .. ဘယ်လိုအရာမျိုးနဲ့ ကြုံတွေ့ရပါစေ ကျမ မတုန်လှုပ်ချင်မိဘူး .. ဒီလိုနဲ့ ကျမစဉ်းစားတတ်လာတာက ရည်ရွယ်သလို ဖြစ်လာခဲ့ရင် အတိုင်းထက် အလွန်ပေါ့ .. တကယ်လို့များလို့ မတွေးချင်ပေမယ့် ကျမ တွေးမိတယ် .. ကံတရားကိုပဲ အပြစ်ပုံ မချပါဘူး .. ကျမလုပ်ရပ်လည်း ထပ်တူ ပါဝင်နေပါလိမ့်မယ် ..

ဒီလိုတွေးလို့ သိပ်ရင့်ကျက်နေတာလည်း မဟုတ်ပြန်ပါဘူး .. ကျမ အတ္တတွေ ကြီးနေခဲ့တာ ကိုယ်တိုင် သိနေခဲ့ပါတယ် .. ထိန်းသိမ်းထားပါစေ .. ကျမပိုင်ဆိုင်နိုင်တာ ဒါလေးပဲ ရှိလို့ပါ .. မကောင်းဘူးဆိုတာလည်း သိပါတယ် .. ကျမကို အကာအကွယ် ပေးနိုင်တာ ဒါလေးပဲ ရှိလို့ပါ .. တချို့ ပြောတာ ကြားဖူးတယ် .. မသိတဲ့လူထက် သိရဲ့နဲ့ ဆက်လုပ်နေတဲ့လူကို ပိုပြောရခက်သတဲ့လေ .. ကျမ များ ပါနေပြီလား ..

ဖြစ်နိုင်မယ် ဖြစ်ခဲ့မယ်ဆိုရင်ပေါ့ .. အေးချမ်းတဲ့နေရာလေးမှာ သက်ဆုံးထိ ငြိမ်းငြိမ်းချမ်းချမ်း တယောက်ကိုတယောက် ဖေးမ ကူညီရင်း ဖြတ်သန်းသွားချင်ပါတယ် ..

ကျမအတွက် အချစ်ဆိုတာ ဘာပါလို့ ပြောဖို့ တော်တော်ခက်ခဲတယ်ဆိုတာ ခုစဉ်းစားလေ ပိုသေချာလေပါပဲ .. အမှန်အတိုင်း ပြောရရင် အချစ်ဆိုတာကို ကျမ အယုံအကြည်မရှိတာ တော်တော် ကြာနေပါပြီ .. ၁၀ ကျော်သက်တုန်းကတော့ ချစ်တယ် ဒါကို အချစ်လို့ ထင်မှတ်မှားခဲ့ပေမယ့် အချိန်ကြာလေ မှုန်ဝါးလေပါပဲ .. ကျမ ယုံကြည်တာ သံယောဇဉ်နဲ့ နားလည်မှု .. ဒါပေမယ့် ဘယ်လိုပြောပြော ကျမ သူ့ကို ချစ်ပါတယ် ..

အချိန်အားတိုင်း သူ့အကြောင်း စဉ်းစားမိတာ .. စိတ်က သူ့ အနား ရောက်ရောက်နေတတ်တာ .. ဦးနှောက်နဲ့ စိတ်ထဲမှာ သူ့အကြောင်းတွေ ပြည့်နေတယ်လို့ ခံစားရတာ .. ဒါတွေက သူ့ကို ချစ်လို့ ဆိုရင် ကျမ သူ့ကို ချစ်ပါတယ် .. သူ့ပါးစပ်က တခြားမိန်းကလေးအကြောင်း မကြားချင်ဘူး .. ဒါဟာ သ၀န်တိုတယ်ဆိုရင် အရမ်း သ၀န်တိုပါတယ် .. ချစ်လို့လည်း သ၀န်တိုတယ် ထင်ပါတယ် .. (ဂုဏ်ယူလိုက်စမ်းပါ .. ချစ်လို့ သ၀န်တိုတာနော် .. မချစ်လို့ကတော့ လှည့်ကို မကြည့်ဘူး .. :P) ကျမစိတ်က အကုန်ရချင်တာ .. လောဘက အဲလို ကြီးပါတယ် ..

တခု ခက်နေပြန်တာက ကျမက ချစ်မပြတတ်တာ .. ချစ်တယ် ဆိုတဲ့ စကားတခွန်းကို မမေးပဲ မပြောတတ်တာ .. မေးရင်တောင် အူကြောင်ကြောင် လုပ်ပြီး ပြောချင်မှ ပြောတတ်တာ .. ဖာသိဖာသာ နေတတ်တာ .. နင်ဘာလုပ်လုပ် ငါဘာမှမဖြစ်ဘူးဆိုတဲ့ စိတ်မျိုး သွင်းထားတတ်တာ ဒီလုပ်ရပ်တွေကြောင့် သူကတော့ ကျမချစ်ပါတယ်ဆိုရင်တော့ ယုံကြည်ဖို့ ခက်နေမှာပါပဲ .. ကျမ ချစ်ပြတတ်အောင် ကြိုးစားမှ ထင်ပါရဲ့ .. မတော် စိတ်ကုန်သွားမှ ဒွတ်ခ :P .. အချိန်မှီသေးတယ် ထင်ပါရဲ့ .. တကယ် လက်တွေ့မှာ ခက်ခဲတာ ကြိုးစားတိုင်းပါပဲ :D .. ပါရမီ နည်းပုံများ .. :P

နောက်တခုက ကျမ မနူးညံ့တတ်ဘူး .. နာမည်တောင် ပေးထားတာ မိုးခါးတဲ့ .. ယောကျာ်းလေးနဲ့ မှားမှားပြီးတောင် အမေး ခံရတယ်လေ .. မိန်းကလေး မဆန်ဘူးပေါ့ .. ဒီလိုဆို သူများနောက် ပါသွားမှာပဲတဲ့ .. ဒါက ကြားကြားနေတဲ့ ဝေဖန်သူတွေ စကား .. အစတုန်းကတော့ ကိုယ့်မချစ်လို့ သူများနောက်ပါလို့ကတော့ မလွမ်းသေးပါတဲ့ .. မိုးခါးတို့ ကြွေးကြော်ပုံ .. ခုရော .. (မပြောပြဘူး .. သတ်ချင်သတ် :P)

ဘယ်လိုပဲ ဖြစ်ဖြစ် ကျမ သူနဲ့ ချစ်သူဖြစ်ရတာ ပျော်တယ် .. ကျေနပ်တယ် .. ဒါတွေက နောင်တချိန် အတူထိုင်ရင်း ပြန်ပြောင်း ပြောဖြစ်မယ့် ကြည့်နူးစရာ အဖြစ်တွေလည်း ဖြစ်ကောင်းဖြစ်မယ် .. ဖြစ်နိုင်ဖို့ မျှော်လင့်ပါတယ် ..း)) ကျမအတွက် သူက နားခိုစရာ သစ်ပင်ရိပ်လေးတခုလောက် ဖြစ်လာရင် သိပ်ကောင်းမှာပဲ .. ပန်းတွေ ဝေေ၀ဆာဆာပွင့်နေတဲ့ သစ်ပင်ပေါ့နော် .. :D

ဒွင်းတဂ်တဲ့ အချစ်အကြောင်းနဲ့ မမ၀ါတဂ်တဲ့ ပန်းလေးပေါ့နော် .. (ယောကျာ်းလေးကို ပန်းနဲ့ နှိုင်းရတာ သိပ်တော့ မနိပ်ဘူး .. ကိုယ့်ချစ်သူကလည်း သိပ်နူးညံ့ ငြင်သာတယ်ဆိုတော့လေ .. နှိုင်းရတာ ကွက်တိပါပဲ .. :D) မမ၀ါရော ဒွင်းရော ကျေနပ်မယ် ထင်ပါတယ်နော် .. အချစ်အကြောင်းတဂ်ခံရတော့မှ ကိုယ့်မှာ ဒီလောက် ပါရမီနည်းမှန်း သိရပါတော့တယ် .. တော်တော်ဝမ်းနည်းတွားဒယ်ကွယ် .. ဒါကြောင့် ဒီလောက် ကြာသွားတာ .. ခွင့်လွှတ်နော် .. မီးယားနဲ .. :D

နှစ်သက်မယ်ထင်မိတာလေးတွေ

Related Posts Plugin for WordPress, Blogger...